Küçələrdən meydanlara MFL
Küçələrdən MeydanlaraMFL

Qaydalar

 

1. Liqa iştirakçıları

1.1 Yaşı 16-dan yuxarı olan və şəxsiyyəti təsdiq edən sənədi olan hər kəs liqada iştirak edə bilər (Təvəllüdü 01.01.2000-ci ildən sonra olan şəxslər).

1.2 Liqa iştirakçıları həvəskar oyunçular olmalıdırlar. Son 3 ildə Peşəkar futbol və Futzal Yüksək Liqasında iştirak etmiş oyunçular və son 1 ildə Futzal 1-ci Liqasında çıxış etmiş oyunçular MFL-ə qatıla bilməyəcəklər.

1.2.1 Hər komandanın heyətində yalnız 1 oyunçu Futzal 1-ci Liqanın nümayəndəsi ola bilər.

1.3 Oyunçu yalnız 1 MFL komandasının heyətində qeydiyyatdan keçə bilər.

1.3.1 Oyunçunun MFL-i xəbərdar etmədən 1 komandadan başqa komandaya keçməsi qadağandır. Bu hal aşkarlandıqda, oyunçu liqadan kənarlaşdırılır, sonuncu (keçəcəyi klub) klubun hesabından 3 xal silinir və buraxılmış 3 topa səbəb olur.

1.4 MFL çempionatı ərzində qeydiyyatdan keçmiş komanda və oyunçular heç bir rəsmi ölkə çempionatına və kubok (peşəkar futbol və futzal yüksək liqa və 1-ci liqa) “yarışmalarına” qatıla bilməzlər.

1.5 Hər komandanın heyətində ən az 12, ən çox 15 oyunçu ola bilər. Heyətdə minimum 2 qapıçı olmalıdır.

1.6 Qeydiyyat zamanı Kapitan və Məşqçilər də qeyd olunmalıdırlar. Hər komandadan 1 məşqçi təqdim oluna bilər.

1.6.1 Məşqçilər, kapitanlar və digər oyunçular haqqında tam detallı informasiya təqdim olunmalıdır.

1.7 Komandalar meydançanın daxilində foto/video çəkiliş etmək üçün əlavə elektron ərizə ilə müraciət etməlidirlər. Texniki şərtlərə cavab verən nümayəndələrə buraxılış təqdim olunacaq. 

1.8 Komandaların heyətinin yenilənməsi və transferlər yalnız “Qış fasiləsi”ndə baş verir. Yenilənmə 4 oyunçu ilə keçirilə bilər (-4 +4).

1.8.1 Bütün yeniliklər və müraciətlər Qış Fasiləsinin 1-ci yarısına - 10 yanvar tarixinə kimi göndərilməlidir. 11 yanvar 2017-ci ildən transfer və heyət ilə bağlı göndərilən müraciətlərə baxılmayacaq. 

1.8.2 10 Yanvara qədər göndərilmiş müraciətlərdə oyunçuların qeydiyyatı ilə bağlı çətinlik yaranarsa, əlavə oyunçunun təqdim olunması üçün 48 saat vaxt ayrılacaq. 


 

2. Qeydiyyat

2.1 Qeydiyyat üçün komanda rəsmi saytda hazır formanı dolduraraq, bütün komanda üzvləri – oyunçular, məşqçi və komandanı təmsil edən media nümayəndəsi haqqında informasiya verməlidir.

2.2 Sifariş sənədləri elektron formada, əvvəlcədən müəyyən edilmiş vaxtda verilməlidir.

2.3 Sənədlər tələb olunan tarixdən gec təqdim olunduğu təqdirdə komanda liqaya buraxılmayacaq. 

2.4 Oyunçuların şəxsiyyət vəsiqəsinin "scan" olunmuş versiyası və şəxsi məlumatları təqdim olunmalıdır.  

2.5 Qeydiyyat üçün ödəniş həyata keçirilməlidir. Ödəniş hər komanda üçün 1000 AZN-dir.

2.6 Korporativ (brend adı ilə çıxış edən) komandalar üçün qeydiyyat məbləği - 2000 AZN-dir.

2.7 Ödəniş iki formada aparıla bilər: Tam ödəniş, 50% + 45 Gün sonra digər 50%.

2.8 Bütün növ ödənişlər üçün son tarix Püşkatma günüdür.  


 

3. Vacib Müddəalar

3.1 Meydana çıxan oyunçu öz iştirakı ilə təsdiqləyir:

3.1.1 Reqlament və Qaydalar ilə tanış olub.

3.1.2 Çempionat boyu oyunlarda alına bilən zədələrə görə oyunçunun özü məsuliyyət daşıyır.

3.2 MFL idman tədbiridir. Ona görə:

3.2.1 Geyimlərin üzərində Siyasi, Dini, Aqressiya və Təhqir tərkibli mətnlər və rəsmlər olmamalıdır.

3.3 Komandanın adı:

3.3.1 Xarici və yerli futbol klublarının fan klublarına ad istifadəsində məhdudiyyət yoxdur.

3.3.2 Korporativ və brend adları, həmçinin dövlət orqanlarının adları həmin təşkilatlar tərəfindən təsdiqlənmiş olmalıdır.


 

4. Meydançada, Geyim və Oyunda davranış qaydaları

4.1  Meydançada hər komandadan yalnız oyunçular, 1 məşqçi, 1 media nümayəndəsi ola bilər.

4.1.1 Hər hansı komanda tərəfdən meydanda əlavə insanlar olarsa, oyun başlaya bilməz.

4.1.2 Oyun başlayandan sonra 5 dəqiqə ərzində meydançada ancaq icazəli iştirakçılar qalmadıqda, səbəbkar komandaya texniki məğlubiyyət verilir.   

4.2  Meydançaya su və idman geyimlərindən başqa əlavə əşya ilə daxil olmaq olmaz.

4.2.1 Oyun başlayandan sonra qapılar bağlanır və giriş-çıxış məhdudlaşdırılır.

4.2.2 Fasilədə oyunçu və məşqçilərdən başqa heç kəsin meydançaya girişi-çıxışı mümkün deyil.

4.3 Komandalar oyuna kapitansız çıxa bilməzlər. 

4.3.1 Kapitanlarda oyun zamanı mütləq kapitan sarğısı olmalıdır.

4.3.2 Komandanın start heyətində kapitan dəyişərsə, MFL-ə oyundan 1 gün öncə məlumat verilməlidir.

4.4 Geyim

4.4.1 Yalnız süni ot örtüyü üçün nəzərdə tutulmuş idman ayaqqabıları ilə oyuna qatılmaq olar.

4.4.2 Eynək ilə (optik və gün ) oynamaq qadağandır. Optik eynək mütləq idman standartlarına uyğun olmalıdır.

4.4.3 Bəzək aksessuarları (üzük, boyunbağı) ilə meydançaya daxil olmaq olmaz.

4.4.4 Komandalara eyni geyimdə gəlmək məcburiyyəti yoxdur. Amma komanda oyunçularından ən azı ikisi fərqli geyimdə olduqda, komanda önlükdə oynamalıdır.  

4.4.5 Hər iki komanda eyni rəngli geyimdə meydançaya çıxarsa, seçim üstünlüyü ev sahibi komandasına verilir.

4.5 Oyunda

4.5.1 Meydançada oynayan və ya ehtiyatda olan oyunçular və məşqçilər hakimin qərarına hörmətlə yanaşmalıdırlar.

4.5.2 Mübahisəli məqamlarda ehtiyat oyunçular və məşqçi meydançaya daxil ola biməz. Onlar hakimin işinə çətinlik yaratmamalıdırlar.

4.5.3 Hakimi və rəqib komandanı təhqir və təhdid edən komanda üzvləri (oyunçular, məşqçi, media nümayəndəsi, azarkeşlər) 2 oyunluq distiplinar cəza alır və komanda -3 xal itirir. 

4.6 Meydanda hakim ilə müzakirəni ancaq Kapitan apara bilər.

4.6.1 Digər oyunçuların mübahisəsi hakimə təzyiq kimi dəyərləndirilir və Sarı kart ilə cəzalandırılır (hətta bu, sayca 3-ci sarı kart olsa belə).

4.7 Oyun zamanı bütün qərarlar Hakim tərəfindən verilir və bu, onun şəxsi məsuliyyətidir.

4.8 Hakimin Qol haqqında olan qərarlarına “etiraz” MFL tərəfindən baxılmır. Kartlar və Cərimələr ilə bağlı etirazlar kartların ləvği ilə nəticələnməyəcək. Daha ciddi qayda pozuntuları aşkar olunduqda, sanksiyalar artırıla bilər. 

4.9 Distiplinar cəzalar ilə bağlı Hakimin oyun zamanı qərarı olmasa belə, MFL tərəfindən oyundan sonra, 48 saat ərzində də tətbiq oluna bilər.


 

5. Oyun – Qaydalar

5.1 Oyunun əsas vaxtı 40 dəqiqədir ( 20 – 20 )

5.2 Komanda meydana 6 əsas oyunçu, 4 ehtiyat və 1 məşqçi olmaqla, maksimum 11 nəfər ilə gələ bilər.

5.3 Əvəzetmələrin sayı məhdudiyyətsizdir.

5.4 Oyunlar “bərabər” bitdikdə, Əlavə vaxt və Penalti tətbiq olunmur. Heç-heçə ilə tamamlanır.

5.5 1 taym ərzində 6 cərimə zərbəsi = 1 penalti zərbəsi (Penaltidən sonra cərimələr sıfırdan hesablanır).

5.6 Penalti zərbələri – Toplanmış cərimələr olduqda, 10 metrlikdən və ya 9 metrlikdən hesablanır; Cərimə meydançası daxilində olduqda, cərimə meydançası çərçivəsindən zərbələr vurulur.  

5.7 İki ardıcıl sarı kart alan oyunçu meydanı tərk edir və növbəti oyunu buraxır. Eyni qayda birbaşa qırmızı kart alan oyunçuya da aiddir.

5.8 Oyunçusu meydandan qovulan komanda (həmin taymı) azlıqda oynayır. Növbəti taymda heyət yenidən tamamlanır – 6 oyunçu olur.

5.9 Heyət ilə bağlı çatışmazlıqlar olarsa, oyunun başlaması üçün minimum oyunçu sayı 5 nəfərdir.

5.10 Qırmızı kart və zədə səbəbindən meydanda azlıqda qalan komandanın minimum oyunçu sayı 4 nəfərdir.

5.11 Bir komandadan meydanda oyun zamanı cəmi 3 nəfər qalsa, həmin komanda texniki məğlubiyyət alır.   


 

6. Qalibin müəyyənləşdirilməsi və mübahisəli məsələlər

6.1 Liqanın qalibi – Liqanı xal hesabına görə 1-ci yerdə başa çatdıran komandadır.

6.2 Xal hesablanması: Q 3 – H 1 –  M 0  

6.3 Liqanın sonunda iki və daha çox klub eyni xala sahib olduqda:

6.3.1 Komandalar arasında keçirilmiş oyunların nəticələrinə baxılır. Eynidirsə:

6.3.2 Vurulmuş və buraxılmış topların fərqinə baxılır. Eynidirsə:

6.3.3 Vurulmuş qolların sayına baxılır. 

6.4 Liqa ərzində bütün mübahisəli məsələlər şikayətçi olan tərəfin MFL-ə yazılı müraciəti əsasında həll olunur. Yazılı müraciətə baxılması üçün oyun protokolunda Kapitanın etiraz qeydləri və imzası olmalıdır.

6.4.1 Kapitanlar tərəfindən oyun sonrası protokolda yazılan etiraz qeydinə və MFL-ə ünvanlanmış rəsmi elektron məktub müraciətinə 48 saat ərzində baxılacaq.

6.4.2 Etirazla bağlı Müzakirələrdə mahiyyətindən asılı olaraq, bir  və ya maksimum iki komandanın kapitanı iştirak edə və onların rəyləri nəzərə alına bilər.

6.4.3 Hakimlə bağlı şikayətlərə MFL komitəsi tərəfindən yalnız "keyfiyyətin artırılması məqsədi ilə” baxılacaq.

6.4.4 Oyunların nəticələrinə yenidən baxılması yalnız reqlamentin və oyunçulara tətbiq olunan peşəkarlıq məhdudiyyətinin tətbiqində səhvlər olduqda mümkündür.

6.5 Oyunun nəticəsini və tam statistikasını Protokol işçiləri qeyd edəcək. Protokol heyətinin Fair Play və distiplinar qeydləri MFL tərəfindən mübahisəli məsələlərdə əsas kimi nəzərə alınacaq.    


 

7. MFL-in və Komandaların məsuliyyəti

7.1 MFL reqlamentin və digər sənədlərlə təsdiq olunmuş bütün qayda və qanunların tam formada, qərəzsiz və peşəkar yerinə yetirilməsi üçün məsuliyyət daşıyır.

7.2 MFL komandaların və oyunçuların meydandakı və meydandan kənardakı əməllərinə və hərəkətlərinə görə inzibati və maddi məsuliyyət daşımır.

7.3 MFL təşkil etdiyi çempionatın texniki, inzibati və maddi cəhətdən öncədən təyin olunmuş səviyyədə həyata keçirilməsi üçün məsuliyyət daşıyır. 

7.4 MFL Konferensiyalarının oyunları texniki səbəblərə görə müvəqqəti olaraq əvvəlcədən təyin olunmuş stadionlarda deyil, digər məkanlarda keçirilə bilər. 

7.5 Komandalar reqlamentdə qeyd olunmuş qayda və qanunları tam həcmdə anlamalı və yerinə yetirməlidirlər.

7.6 Komandalar təyin olunmuş oyunlara gəlmədikləri halda intizam cəriməsi alacaqlar. Bu hal 2-ci dəfə təkrarlanarsa, həmin komanda çempionatdan kənarlaşdırılacaq və onun bütün oyunları texniki məğlubiyyət kimi hesablanacaq.

7.7 Komandalar oyunlarda “Fair Play” şərtinə əməl etməlidirlər.  

7.8 Komandalar tərəfindən Reqlament və digər qaydalar ciddi şəkildə pozularsa, "Fair Play" şərtlərinə dəfələrlə məhəl qoyulmazsa və “Danışılmış oyunlar” ehtimalı yaranarsa, komandanın çempionatdan müvəqqəti və ya həmişəlik kənarlaşdırılması cəzası tətbiq oluna bilər.

7.9 Komandaların Kapitanları və Məşqçiləri MFL-in bütün tədbirlərində, iclaslarında və mükafatlandırma mərasimlərində iştirak etməlidirlər. Qeyd olunmuş tədbirlərdə qeyd olunmuş komanda üzvlərinin üzrlü səbəb olmadan iştirak etməməsi MFL-in həmin komandalara olan “Etibarlılıq” reytinqini aşağı salır.